Gómsæt vegan pokeskál með marineruðu tófú

/

-Samstarf-

Í dag deilum við með ykkur uppskrift af gómsætri vegan pokeskál með sushihrísgrjónum, maríneruðu tófú, fersku mangó, litríku grænmeti og srirachamajónesi. Máltíð sem er tiltölulega auðvelt að útbúa og smakkast eins og á veitingastað. Viltu ganga í augun á vinum og fjölskyldu? Þá er þessi pokeskál fullkomin að elda!

Pokeskál hefur lengi verið einn af mínum uppáhalds réttum að panta mér þegar ég fer út að borða, en eftir að ég prófaði að gera hana sjálf hef ég mun heldur valið að útbúa hana heima. Með því er hægt að útfæra skálina algjörlega eftir eigin höfði og svo er gaman að bjóða uppá hana í matarboðinu, skera niður allskonar grænmeti og leyfa fólki að útbúa sínar eigin.

Bæði sushihrísgrjónin og tófúið gegna lykilhlutverki í pokeskálinni. Ég var lengi hrædd við að útbúa sushihrísgrjón heima því mér fannst það hljóma eins og það væri svaka vesen. Ég get þó sagt að það er alls ekki erfitt. Það má auðvitað gera pokeskál með annarri tegund af hrísgrjónum, en það er að mínu mati ekki eins gott og gefur ekki þessa sushi tilfinningu.

Tófuið er svo próteinið í réttinum og gefur seltu og umame. Ég lét það marínerast í sojasósu, sesamolíu, hrísgrjónaediki, agavesírópi og srirachasósu. Svo bætti ég sesamfræjum við og bakaði tófúið í ofni þar til það varð stökkt að utan.

Pokeskálina toppaði ég svo með tófúinu og allskonar fersku og góðu grænmeti. Þarna er hægt að fara alveg eftir eigin höfði. Ég valdi ferskt mangó, gúrku, lárperu, pikklaðan rauðlauk og kóríander. Að lokum hrærði ég svo saman majónesi og srirachasósu og setti út á ásamt smá limesafa. Ég er ekki að grínast þegar ég segi að þetta smakkaðist eins og á veitingastað.

Viltu bjóða upp á gómsæta pokeskál í matarboðinu og vantar hugmynd að góðum eftirrétti? Þá mælum við með þessari geggjuðu sítrónuostaköku!

Eins og ég sagði er hægt að fara alveg eftir eigin höfði og smekk þegar verið er að setja saman pokeskál. Ég geri þær í raun aldrei alveg eins. Hér eru t.d. nokkrar hugmyndir að öðru grænmeti sem er gott í skálina:

Radísur
Edamame baunir
Rifnar gulrætur
Rifið hvítkál eða rauðkál
Nori eða annar þari
Vorlaukur

Það er endalaust hægt að leika sér og prófa sig áfram!

Takk fyrir að lesa og vona innilega að þér líki uppskriftin.

Helga María! <3

Gómsæt vegan pokeskál

Gómsæt vegan pokeskál
Fyrir: 4
Höfundur: Helga María
Gómsæt vegan pokeskál með sushihrísgrjónum, maríneruðu tófú, fersku mangó, litríku grænmeti og srirachamajónesi. Máltíð sem er tiltölulega auðvelt að útbúa og smakkast eins og á veitingastað. Viltu ganga í augun á vinum og fjölskyldu? Þá er þessi pokeskál fullkomin að elda!

Hráefni:

sushihrísgrjón
  • 500 gr sushihrísgrjón
  • 800 ml vatn
  • 2 msk hrísgrjónaedik
  • 1 msk sykur
  • 1 tsk salt
Marínerað ofnabakað tófú
  • 1 kubbur tófú (400-500 gr)
  • 3 hvítlauksgeirar
  • 1 "þumall" engiefer
  • 3 msk sojasósa
  • 3 msk hrísgrjónaedik
  • 2 msk sesamolía
  • 2 tsk agavesíróp
  • 1/2-1 msk sriracha (fer eftir smekk)
  • 1 msk sesamfræ
Pikklaður rauðlaukur:
  • 2 meðalstórir eða 3 litlir rauðlaukar
  • 3 dl vatn
  • 2 dl sykur
  • 1 dl edik
  • 1 tsk salt
  • piparkorn (má sleppa)
Pokeskálar fyrir fjóra:
  • Soðin sushihrísgrjón
  • Ofnbakað tófú
  • Grænmeti eftir smekk (ég notaði gúrku, pikklaðan rauðlauk, mangó, lárperu, og limesafa)
  • Sesamfræ að toppa með
  • Vegan majónes + srirachasósa blandað saman

Aðferð:

Sushihrísgrjón:
  1. Hreinsið grjónin vel undir köldu vatni.
  2. Setjið þau í skál og hellið köldu vatni yfir og látið standa í 20 mínútur.
  3. Hellið vatninu af, setjið grónin í pott og bætið hreinu vatni saman við.
  4. Setjið lok yfir og látið ná suðu, lækkið þá hitann og látið grjónin malla á lágum hita í 10 mínútur með lok yfir, eða þar til ekkert vatn er í pottinum lengur.
  5. Slökkvið undir, takið pottinn af hellunni og látið standa í 10 minútur með lokið á.
  6. Hrærið saman hrísgrjónaediki, sykri og salti.
  7. Hellið yfir grjónin og blandið með velta grjónunum varlega til og frá með hrísgrjónaskeið eða trésleif. Passið samt að vera ekki harðhent svo þau klessist ekki saman.
Marínerað ofnbakað tófú
  1. Látið vökvann renna af tófúinu, vefjið því inn í viskastykki og leggið pönnu eða eitthvað svolítið þungt yfir og leyfið því að pressast í svolítinn tíma.
  2. Blandið saman blautu hráefnunum í stóra skál.
  3. Rífið niður engifer og hvítlauk í skálina.
  4. Skerið tófúið í bita og setjið í maríneringuna í a.m.k. 1 klukkustund.
  5. Hitið ofninn í 200°c
  6. Hellið tófúinu í eldfast mót og bakið í sirka 20-30 minútur eða þar til það er orðið svolitið stökkt að utan og hefur tekið á sig lit.
Pikklaður rauðlaukur:
  1. Skerið laukinn niður í þunna strimla. Ekki saxa hann. Ég sker hann í tvennt og svo í strimla.
  2. Blandið sykri, vatni og ediki saman í pott og látið hitna þannig að sykurinn leysist upp.
  3. Setjið laukinn í hreina krukku og hellið vökvanum yfir.
  4. Látið standa í klukkustund.
  5. Laukurinn geymist í allt að 2 vikur í ísskáp.
Pokeskálar:
  1. Sjóðið grjónin.
  2. Bakið tófúið.
  3. Útbúið rauðlaukinn ef þið viljið hafa hann.
  4. Skerið niður það grænmeti sem þið viljið hafa.
  5. Blandið saman majónesi og srirachasósu.
  6. Setjið saman skálarnar.
  7. NJÓTIÐ!
Prufaðir þú þessa uppskrift?
Taggaðu @veganistur.is á instagram og notaðu hashtaggið # veganistur

-Þessi uppskrift er í samstarfi við Hagkaup og fást öll hráefnin í hana þar-