Haustlegt kartöflusalat með Ceasar dressingu

Ég held að það sé óhætt að segja að það sé komið haust og þar af leiðandi er fullt af fersku og góðu grænmeti í búðum akkúrat núna. Ég elska að gera góða rétti úr rótargrænmeti á haustinn og finnst það alltaf fylgjast haustinu á mínu heimili. Kartöflur eru eitt af þeim hráefnum sem er sérstaklega gott á haustinn að mínu mati og ef það er einhver matur sem ég held að ég gæti lifað alfarið á, þá eru það kartöflur. Ég bókstaflega elska kartöflur, hvort sem þær eru soðnar, ofnbakaðar, maukaðar í kartfölumús eða bara hvernig sem er.

Einn af mínum uppáhalds réttum með kartöflum er kartöflusalat. Ég elska að hafa eitthvað í matinn sem passar með kartöflusalat til að geta haft það sem meðlætii. Þetta salat er engu líkt og það er svo gott að það er nánast hægt að borða það eitt og sér. Það má einnig bæta út í það t.d. linsubaunum og meira af salati og þá er það orðið máltíð út af fyrir sig. Ég hins vegar elska að hafa sem mest af kartöflum og sem minnst af einhverju öðru og ef ég á að segja alveg eins og er stelst ég oft í að setja afgang af salatinu ofan á brauð og borða það þannig.

Salatið er einstaklega einfalt í undirbúningi, þar sem ég notast við Ceasar dressinguna frá Sacla Italia og þarf þar með ekki að krydda neitt aukalega nema mögulega setja smá salt. Það er þó best að smakka salatið til fyrst þar sem “reyktu bitarnir” eru einnig saltir.

Hráefni

• 500 gr kartöflur

• Klettasalat, sirka 2 bollar

• 2-3 litlir vorlaukar

• 1 dl smokey bites frá Oumph

• 1/2 dl ristaðar furuhnetur

• salt ef þarf

• 1/2 flaska vegan Ceasar sósa frá Sacla Italia

Aðferð:

1. Skerið kartöflurnar í bita, stærðin má vera eftir smekk, og sjóðið í um 10 mínútur eða þar til þær eru mjúkar í gegn. Ég hef hýðið á kartöflunum en það má að sjálfsgöðu taka það af.

2. Saxið niður vorlaukinn og klettasalatið.

3. Steikið reyktu bitana í nokkrar mínútur á pönnu, takið til hliðar og ristið síðan furuhneturnar á sömu pönnu þar til þær verða fallega gylltar.

4. Leyfið öllum hráefnum að kólna aðeins.

5. Blandið öllu saman í skál og hellið dressingunni yfir. Hrærið vel saman og smakkið til hvort að þurfi að salta aukalega.

-Njótið vel og takk fyrir að lesa.

- Þessi færsla er unnin í samstarfi við Sacla Italia á Íslandi -

Djúpsteiktir vegan mac and cheese bitar

Hæ!

Uppskriftin sem við deilum með ykkur í dag er hinn FULLKOMNI partýmatur. Djúpsteiktir vegan mac and cheese bitar. Svo dásamlega stökkir að utan og djúsí að innan. Bitarnir henta vel sem t.d pinnamatur, meðlæti, snarl eða kvöldmatur. Þeir myndu bókstaflega slá í gegn sem meðlæti með góðum hamborgara eins og þessum HÉR!

Færslan er í samstarfi við Violife á Íslandi en við elskum ostinn frá þeim. Í uppskriftina ákvað ég að nota tvær týpur, Original flavor og Epic mature cheddar. Mér fannst þeir passa svo vel saman í ostasósuna. Það er þó hægt að nota hvaða ost frá þeim sem er. Það er örugglega geggjað að prófa að setja svolítið af rjómaosti líka. Möguleikarnir eru endalausir. Ég vissi að ég vildi nota Epic mature cheddar ostinn til að fá þetta gómsæta cheddar bragð. Ég sé sko ekki eftir því!

Hér í Piteå fæ ég ekki rifna ostinn frá Violife svo ég keypti hann í stykki og reif sjálf. Þið heima búið hinsvegar svo vel að geta keypt hann rifinn svo ég mæli með því. Epic mature osturinn fæst bara í stykkjum þó.

Þennan rétt er hægt að leika sér með og breyta eftir eigin höfði. Ég mæli auðvitað með því að ALLIR prufi að gera djúpsteikta mac and cheese bita, en það er auðvitað hægt að borða matinn beint úr pottinum eða færa hann í eldfast mót, strá yfir t.d. panko brauðraspi og baka í ofni. Ef þið veljið að baka hann í ofni eða borða beint úr pottinum er örugglega gott að bæta við t.d. brokkólí eða öðru grænmeti í hann!

Við vitum öll hvað er gaman að koma fólki á óvart með spennandi nýjum réttum sem kannski flestum hefði ekki einu sinni dottið í hug að útbua. Þessir bitar eru akkúrat dæmi um svoleiðis mat. Matur sem stelur senunni við allskonar tilefni!

Djúpsteiktan mat tekur alltaf svolitla stund að útbúa en þrátt fyrir það er virkilega einfalt að útbúa djúpsteiktu mac and cheese bitana. Þeir eru einnig dæmi um mat sem gaman er að útbúa og okkur systrum þykir alltaf jafn spennandi að smakka eitthvað nýtt. Hlökkum mikið til að heyra hvað ykkur finnst!

Djúpsteiktir vegan mac and cheese bitar (sirka 30 stykki litlir bitar)

Hráefni:

Fyrir sjálfan mac and cheese réttinn:

• 125 gr makkarónur

• 20 gr smjörlíki

• 20 hveiti

• 3 dl vegan mjólk (ég notaði haframjólk)

• 80 gr Violife ostur að eigin vali (ég notaði 40 gr original og 40 gr epic mature cheddar)

• 1/2 tsk laukduft

• 1/2 tsk hvítlauksduft

• 2 msk næringarger

• 1/2 tsk eplaedik

• salt og pipar eftir smekk

Það sem þarf til að velta uppúr og djúpsteikja:

Blautt:

• Sirka 500 ml hrein vegan jógúrt

• 1 tsk eplaedik

• Nokkrir dropar hot sauce (má sleppa en ég mæli með)

Þurrt:

• 2 dl hveiti

• 2 dl panko brauðrasp (eða venjulegt brauðrasp ef þið finnið ekki panko)

• 1 tsk lyftiduft

• 1 tsk salt

• 2 tsk hvítlauksduft

• 2 tsk laukduft

• 3 tsk paprikuduft

• 1 tsk oregano krydd

• 1 tsk timían krydd

• 1 tsk basilika krydd

• 1 tsk hvítur pipar

• svartur pipar eftir smekk

• Olja að djúpsteikja í (ég notaði 1 líter)

Aðferð:

1. Sjóðið makkarónurnar eftir leiðbeiningum á pakkanum. Saltið vatnið vel.

2. Bræðið smjörlíki í öðrum potti.

3. Bætið hveiti út í og hrærið með píski. Leyfið hveitiblöndunni að eldast svolítið og hrærið í á meðan. Við viljum fá burtu bragðið af hráu hveiti en hveitiblandan á þó ekki að verða brún.

4. Bætið mjólkinni út í sirka 1 dl í einu og hrærið ve á meðan. Þannig fáiði þykka og fína sósu.

5. Bætið rifna ostinum, eplaediki, laukdufti, hvítlauksdufti, salti og pipar samanvið og hrærið þangað til osturinn er alveg bráðinn.

6. Hellið vatninu af makkarónunum og bætið þeim út í sósuna ásamt næringargerinu. Saltið og piprið meira ef ykkur finnst þurfa. Þetta má vera svolítið braðgmikið.

7. Leggið réttinn í box og setjið inn í ísskáp í klukkutíma.

8. Takið út og myndið litlar bollur. Mér finnst gott að hafa bitana svona sirka 2 munnbita. Þannig fékk ég 30 kúlur. Leggið bollurnar á fat og setjið í frystinn í sirka hálftíma eða þar til bollurnar eru orðnar vel stífar. Þær þurfa ekki að frosna þó.

9. Undirbúið djúpsteikinguna. Blandið saman jógúrti, eplaediki og sterku sósunni í djúpan disk.

10. Blandið saman hveiti, panko brauðraspi, lyftidufti og öllum kryddunum í annan djúpan disk.

11. Hitið olíuna í 180°c.

12. Veltið bitunum í jógúrtblönduna og svo hveitiblönduna og djúpsteikið þar til bitarnir fá fallegan, dökkan gylltan lit.

13. Berið fram með t.d. vorlauk og góðri sósu. Ég mæli með salsasósu eða pizzasósu.

Takk kærlega fyrir að lesa og vona að þið njótið!
Ekki gleyma að tagga okkur á Instagram ef þið prófið einhverja af réttunum okkar! <3

-Helga María

-Þessi færsla er í samstarfi við Violife á Íslandi-

Tælensk núðlusúpa með rauðu karrý

Eftir að hafa eytt þremur mánuðum í asíu fyrir nokkrum árum hefur asískur matur og þá sérstaklega tælenskur matur verið í mjög miklu uppáhaldi hjá mér. Ég hugsa að ég gæti borðað núðlur, hrísgrjón og karrý á hverjum einasta degi án þess að fá leið á því. Í ferðinni áttaði ég mig á því hversu miklu betri asískar þjóðir eru í að nota krydd og grænmeti heldur en við og fann ég hvergi fyrir því að erfitt væri að vera vegan eða að borða ekki kjöt. Allir réttir eru stútfullir af góðu grænmeti, hrísgrjónum, núðlum og geggjuðum kryddum.

Ég gerði þau mistök að kaupa mér ekki krydd og kryddblöndur til að taka með heim, en ég fór hins vegar mikið að prófa alls konar kryddmauk í matargerð eftir að ferðinni lauk. Það er til fjöldin allur af góðum karrý og kryddmaukum hérna heima sem gera tælensku og asísku matargerðina einfalaldari en hægt er að hugsa sér. Það þarf þó að passa sig á því að oft má finna innihaldsefni í slíkum maukum sem ekki eru vegan eins og t.d. fiskisósur og fiskikraft.

Í krónunni er einstaklega gott úrval af svona kryddmaukum og finnst mér ég finna eitthvað nýtt í nánast hverri einustu búðarferð. Ég get eitt góðum tíma í þessari deild búðarinnar að skoða allar þessar spennandi vörur. Maukinn og vörurnar frá Taste of Asia gripu strax athygli mína þegar ég sá þau fyrst snemma á þessu ári en tók ég eftir að flest maukin frá þeim innihalda 100% vegan innihaldsefni og henta mér því einstaklega vel.

Ég hef prófað mikið af þessum vörum en hefur rauða karrýmaukið alltaf verið til í skápunum hjá mér síðan ég smakkaði það fyrst. Það er ótrúlega bragðgott, og hentar fullkomlega í súpur, kássur eða bara á tófú og núðlur. Ég elska einnig hvað er gott úrval af góðum núðlum frá þessu merki, en lengi vel var nánast einungis hægt að fá “skyndinúðlur” og hrísgrjónanúðlur í felstum matvöruverslunum.

Í þessari færslu ætla ég að deila með ykkur einum af mínum uppáhalds réttum. Það er kókoskarrýsúpa með tófúi og Somen núðlum.

Hráefni

• 4 msk ólífuolía

• 1 stór gulrót

• 4-5 cm af blaðlauk

• 1 rauð papríka

• 2 hvítlauksgeirar

• 1 cm ferskt engifer

• 1 pakki tófú

• Tófú marinering

  • 1/2 dl soyasósa

  • 4 msk ólífuolía

  • 1 tsk hlynsíróp

  • 1 tsk chilli mauk (sambal oelek frá Taste of Asia)

  • 1/2 tsk pressaður hvítlaukur

• 1 krukka rautt karrýmauk frá Taste of Asia

• 1 tsk chillimauk (sambal oelek frá Taste of Asia) má sleppa

• 2 msk hlynsíróp

• salt og pipar eftir smekk

• 2 dósir kókosmjólk

• 2 lítrar vatn

• 2 grænmetisteningar

• 1/2 pakki somen núðlur frá Taste of Asia

• Límóna og ferskur kóríander til að bera fram með súpunni

Aðferð:

1. Byrjið á því að þerra og skera niður tófúið. Blandið öllum hráefnum fyrir marineringuna saman í skál og setjið teningana út í. Veltið vel upp úr marineringunni og setjið til hliðar

2. Skerið niður allt grænmeti, rífið engifer og pressið hvítlaukinn.

3. Steikið grænmetið upp úr ólífuolíunni í stórum potti þar til það mýkist vel.

4. Bætið rauða karrýmaukinu út í pottinn ásamt 1/2 dl af vatni og steikið áfram í nokkrar mínútur.

5. Bætið kókosmjólkinni út í pottinn ásamt vatninu, grænmetiskraftinum, hlynsírópi og chillimaukinu.

6. Leyfið suðunni að koma upp við vægan meðalhita og hrærið í af og til á meðan.

7. Á meðan súpan sýður er gott að nota tíman til að steikja tófúið. Hitið pönnu, hellið tófúinu ásamt mareneringunni út á pönnuna og steikið á háum hita þar til það verður fallega gyllt á öllum hliðum.

8. Þegar suðan er komin upp á súpunni er gott að smakka hana til og bæta við salti, pipar og grænmetiskraft ef ykkur finnst þurfa. Leyfið súpunni að sjóða í 15 mínútur.

9. Bætið núðlunum út í og leyfið súpunni að sjóða í 3 mínútur í viðbót. Slökkvið undir og bætið tófúinu út í pottinn.

10. Berið fram með límónusneið og ferskum kóríander fyrir þá sem vilja. Einnig er gott að hafa með baunaspírur og muldar salthnetur en það þarf ekki.

-Njótið vel!

- Færslan er unnin í samstarfi við Krónuna -

Grillaðar samlokur með vegan kjúklingasalati

Góðan daginn kæru vinir.

Í dag deilum við með ykkur uppskrift af djúsí grilluðum samlokum með vegan kjúklingasalati og osti. Svo gott að ég gæti grátið!

Uppskriftin er í samstarfi við Hellman’s. Vegan majónesið þeirra er eitt það allra besta á markaðnum og er fullkomið í góð sallöt og sósur. Mér finnst gott að eiga alltaf til krukku af majónesinu þeirra svo ég geti skellt í góða pítu- eða hamborgarasósu hvenær sem er. Já, eða þetta gómsæta vegan kjúkligasalat

Ég er mikið fyrir majónessalöt og þetta tiltekna salat hefur oft slegið í gegn í mínum veislum og partýum. Ég hef borið það fram með góðu kexi og einn skammtur hverfur yfirleitt á nokkrum mínútum. Salatið er líka frábært í allskonar samlokur og langlokur og ég hef líka gert litlar vefjur sem ég sker niður í munnbita. Allt saman jafn gott!

Hugmyndin um að útbúa grillaðar samlokur með salatinu kom til mín í dag. Ég hafði fyrst hugsað mér að bera það öðruvísi fram fyrir færsluna, en lá svo í rúminu í morgun og fékk þessa hugmynd. Ég vissi ekki hvernig það kæmi út og dreif mig að prófa. Guð minn góður hvað ég er glöð að ég gerði það, ég hef ekki borðað jafn góða samloku lengi.

Já ég get líka sagt ykkur það að ég gerði mér sérstaka ferð til Luleå, sirka klukkutíma frá mér, bara til þess að kaupa nýtt samlokugrill því ég vildi gera gómsætar samlokur sem minntu svolítið á grillað panini. Ég vildi fá þessar fínu rendur sem koma í þessum ákveðnu grillum. Ég veit að það er kannski svolítið galið, en ég sé svo sannarlega ekki eftir þessum kaupum.

Ég hlakka til að heyra hvort þið prófið að gera þessar sjúlluðu samlokur og hvað ykkur finnst!

Hráefni:

Vegan kjúklingasalat með karrý

• 1 pakki vegan kjúklingabitar

• Olía til steikingar

• 1 krukka vegan Hellman’s majónes

• 1/2 dl vegan hrein jógúrt eða grísk vegan jógúrt

• 1-2 dl saxaður vorlaukur. Ég setti um 1,5 dl

• 1 tsk hvítlauksduft

• 1 msk karrýduft

• salt og pipar eftir smekk

Hráefni í 3-4 samlokur

• 6-8 brauðsneiðar

• 1 skammtur kjúklingasalat

• Rifinn vegan ostur eftir smekk

• Vegan smjör til að smyrja samlokurnar að utanverðu (má sleppa)

Gott að bera fram með:

• Kóríander

• Pikluðum rauðlauk

• Frönskum

Aðferð:

1. Takið bitana úr frysti og steikið aðeins á pönnu uppúr smá olíu og salti. Bitarnir þurfa í raun ekkert að eldast mikið, bara í nokkrar mínútur þannig þeir séu orðnir mjúkir.

2. Hellið þeim á stórt skurðarbretti og rífið í sundur með tveimur göfflum. Mér finnst þetta skipta miklu máli uppá áferðina á salatinu. Ég ríf þá ekkert alveg niður en ríf þá í sundur í þá stærð sem ég vil hafa bitana í stað þess að skera þá niður.

3. Setjið bitana í stóra skál og bætið restinni af hráefnunum út í og hrærið saman.

4. Leyfið salatinu að standa í ísskáp í allavega klukkustund. Þetta gerir það að verkum að salatið verður bragðmeira og betra. Eins og ég sagði hér að ofan er mjög gott að gera þetta snemma sama dag og þið ætlið að bera salatið fram eða jafnvel kvöldið áður.

5. Smyrjið brauðsneiðar með smjöri að utanverðu

6. Smyrjið salati á og dreifið rifnum osti yfir

7. Grillið samlokurnar í samlokugrilli eða á pönnu þar til osturinn hefur bráðnað og brauðið fengið örlítið gylltan lit.

Takk fyrir að lesa og vona að þið njótið!

-Helga María

-Þessi færsla er í samstarfi við Hellman’s á Íslandi-

Frosin vegan ostakaka með Amaretto, sykruðum möndlum og súkkulaðiganache

Góðan daginn!

Ég vona að þið hafið það gott. Sjálf sit ég við eldhúsborðið og drekk kaffisopa, þakklát fyrir að geta setið inni og unnið á meðan hellirignir úti. Sumarið er að líða undir lok og á þessum nokkrum mánuðum sumarsins hef ég gengið í gegnum miklar breytingar. Í rauninni hefur allt þetta ár haft í för með sér miklar breytingar hjá mér. Allra helst þó eftir að pabbi okkar Júlíu lést í vor. Það hefur opnað fyrir allskonar tilfinningar og spurningar og gert það að verkum að ég lít ýmsa hluti öðrum augum en ég gerði áður. Ég hef alltaf átt það til að ofhugsa aðstæður og festast í áhyggjum yfir hlutum sem ég hef haldið að skipti miklu máli. Hlutum sem virðast skipta máli á því augnabliki, en eru í raun bara smámunir. Ég finn að inni í mér hef ég verið að átta mig á því hversu miklum tíma ég hef eytt í að hafa áhyggjur af og svekkja mig að óþörfu. Á meðan það er að mörgu leyti frelsandi að átta sig á þessu og geta sleppt frá sér því sem hefur verið að taka óþarfa orku, er á sama tíma erfitt að breyta mynstrinu sem hefur verið síðan á unglingsárum.

Ég hef til dæmis eytt miklum tíma í sumar í að hafa áhyggjur af því hversu fjarverandi ég hef verið á blogginu okkar síðasta árið. Hversu lítið af uppskriftum ég hef deilt með ykkur og hvort ég sé að valda ykkur öllum vonbrigðum. Ykkur sem leitið til okkar í von um að finna nýjar og spennandi uppskriftir. Fyrri hluta ársins nagaði þetta mig mikið og ég var farin að hafa áhyggjur af því að ég hefði nú þegar gert allar þær uppskriftir sem ég mun nokkurntíman gera. Eins og ég væri búin að missa alla kunnáttu í eldhúsinu.

Í sumar hef ég svo unnið að því að breyta hugarfarinu mínu og minna mig á hvers vegna ég byrjaði að blogga og hvers vegna ég elska að vera í eldhúsinu. Ég áttaði mig á því að það er enginn annar en ég sem situr heima hjá sér með áhyggjur af því hvort ég muni elda góðan mat í dag eða blogga. Var þetta virkilega mitt stærsta vandamál? Ég stóð upp, gerði plan og byrjaði að elda og baka og mynda og áður en ég vissi af var ég komin aftur í flæðið sem ég hafði ekki komist í lengi.

Ég hef hlakkað mikið til að deila með ykkur uppskrift dagsins. Frosin ostakaka með Amaretto, ristuðum og sykruðum möndluflögum og súkkulaðiganache. Að mínu mati hinn fullkomni eftirréttur. Fyrir ykkur sem ekki viljið nota áfengi í kökuna er ekkert mál að sleppa því, setja smá kaffi kannski eða eitthvað annað sem gefur spennandi bragð. Annars get ég ímyndað mér að það sé gott að prófa að setja Kahlúa ef þið hafið ekkert á móti að nota áfengi en eruð minna fyrir möndlulíkjör.

Sykruðu og ristuðu möndlurnar eru að mínu mati punkturinn yfir i-ið. Þær gefa kökunni þetta litla extra og mér þykir nánast undantekningarlaust nauðsynlegt að hafa einhverskonar “crunch” í því sem ég borða.

Þetta er svo sannarlega eftirréttur sem ég mæli með því að bjóða uppá í matarboði eða veislu. Ef ég væri að halda matarboð í dag myndi ég bjóða uppá þetta gómsæta Tikka masala í aðalrétt og svo ostakökuna í eftirrétt. Hversu gott?!

Frosin ostakaka með Amaretto, sykruðum möndlum og súkkulaðiganache

Hráefni:

Botn:

• 200 gr digestive kex

• 100 gr vegan smjörlíki

• 1 msk sykur

Fylling:

• 2,5 dl vegan þeytirjómi (mæli með þeim frá Oatly. Ein svoleiðis ferna passar í uppskriftina)

• 300 gr vegan rjómaostur

• 1 dl Disaronno Amaretto likjör

• 1,5 dl sykur

• 1 msk vanillusykur

Sykraðar möndlur:

• 2 dl möndluflögur

• 6 msk sykur

• 1 msk vegan smjörlíki

• Pínulítið salt

Súkkulaðiganache:

• 200 gr suðusúkkulaði (eða annað vegan súkkulaði)

• 1,5 dl vegan þeytirjómi (óþeyttur)

• Pínulítið salt

Aðferð:

1. Byrjið á því að útbúa botninn með því að mylja niður kexið, annaðhvort í matvinnsluvél eða með því að setja það í lokaðan nestispoka og brjóta kexið með kökukefli.

2. Bræðið smjörlíki og hellið útí matvinnsluvélina ásamt sykrinum og púlsið þar til það hefur blandast vel saman við. Ef þið myljið kexið með kökukefli, hellið því þá í skál og blandið smjörlíkinu og sykrinum saman við með sleif.

3. Setjið bökunarpappír í botninn á 20 cm smelluformi og smyrjið hliðarnar með smjörlíki. Hellið mulda kexinu í formið og þrýstið því í botninn og aðeins uppí hliðarnar. Setjið í frysti á meðan þið útbúið fyllinguna og möndlurnar.

4. Útbúið möndlurnar með því að hita á pönnu smjörlíki og bæta restinni af hráefnunum saman við.

5. Hrærið stanslaust á meðal háum hita þar til möndlurnar byrja að taka á sig lit og sykurinn hefur bráðnað. Það tekur smá stund en að lokum verða möndlurnar gylltar og fínar.

6. Færið strax yfir á bökunarpappír og látið kólna. Brjótið svo í sundur til að nota í kökuna.

7. þeytið rjómann í stórri skál og leggið til hliðar.

8. Þeytið restina af hráefnunum fyrir fyllinguna saman í annarri skál.

9. Bætið þeytta rjómanum útí skálina og blandið varlega saman með sleif eða sleikju.

10. Takið kökubotninn úr frystinum og setjið fyllinguna í formið. Ég vildi ekki bæta möndlunum út í sjálfa fyllinguna því ég vildi ráða því svolítið sjálf hversu mikið af möndlum ég hafði í. Ég tók frá tæplega helminginn af möndlunum til að toppa kökuna. Ég setti smá fyllingu, stráði svo möndlum yfir, bætti við meiri fyllingu og koll af kolli.

11. Setjið í frysti í 1-2 klukkutíma

12. Gerið súkkulaðiganache með því saxa niður súkkulaði.

13. Hellið þeytirjóma í pott (ekki þeyta hann) og hitið þar til hann er nánast farinn að sjóða.

14. Setjið súkkulaðið í skál og hellið heita rjómanum saman við. Stráið út í örlitlu salti. hrærið varlega þar til súkkulaðið hefur bráðnað í rjómanum. Takið kökuna úr frystinum, hellið súkkulaðiganache yfir, stráið möndlum yfir og setjið aftur inn í frysti í a.m.k fjóra klukkutíma.

15. Takið út 30-60 mínútum áður en þið ætlið að bera kökuna fram.

Takk fyrir að lesa og ég vona að ykkur líki vel.

-Helga María

Kjúklingabaunasalat með vorlauk og vínberjum

Í dag ætla ég að deila með ykkur uppskrift af ótrúlega gómsætu kjúklingabaunasalati. Við erum nú þegar með eina uppskrift af slíku salati hérna á blogginu sem heitir “betra en túnfisksalat” og er alveg ótrúlega gott en það sem ég elska við kjúklingabaunasalöt er hvað er hægt að gera þau á marga vegu. Þetta er eitthvað það þægilegasta sem hægt er að gera þegar von er á heimsókn og slær alltaf rækilega í gegn hjá mér.

Í þetta skipti er salatið í samstarfi við Oddpods en það er baunir sem koma tilbúnar til neyslu beint úr pakningunum. Þær koma þó ekki í niðursuðudósum líkt og baunir gera venjulega og þar af leiðandi ekki í neinum vökva, það gerir það að verkum að þær halda næringarefnum betur. Salatið inniheldur rauða papríku, vorlauk og rauð vínber og er það alveg svo ferskt og gott!

Á Instagram hjá okkur má einnig finna “REELS” myndband þar sem sést hversu auðvelt er að útbúa salatið.

Hráefni:

• 1 pakki kjúklingabaunir frá oddpodds

• 1/2 dl niðursöxuð rauð paprika

• 1/2 dl niðursaxaður vorlaukur

• u.þ.b. 1 dl niðurskorin rauð vínber

• 1/2 tsk paprikuduft

• 1/2 tsk laukduft

• 2 kúfullar msk vegan majónes

• 1 kúfull msk vegan sýrður rjómi (má líka setja 1 msk í viðbót af majónesi í staðin)

• salt og pipar eftir smekk

Aðferð:

1. Byrjið á því að stappa kjúklingabaunir gróft niður með kartfölurstappara eða gaffli.

2. Saxið niður grænmetið og vínberin.

3. Hrærið saman majónesið og sýrða rjómanum.

4. Blandið öllu saman í skál og smakkið til með salti og pipar

-Njótið vel og endilega kíkið á REELS myndböndin okkar á Instagram :D

- Þessi færsla er unnin í samstarfi við Oddpods á Íslandi -

Grillaðar vegan pylsur á þrenns konar vegu

Í dag er föstudagur og því finnst mér tilvalið að deila með ykkur líklega síðustu grillfærslu sumarsins. Þetta sumar er búið að líða alveg ótrúlega hratt og er erfitt að trúa því að núna séu skólar að komast á fullt. Núna í lok ágúst finnst mér því fullkomið að deila með ykkur þessari færslu sem inniheldur mismunandi tillögur af því hvernig bera megi fram Anamma pylsurnar. Anamma pylsurnar eru í miklu uppáhaldi hjá okkur systrum og elskum við að grilla þær því það er svo einfalt og þægilegt. Þær eru einnig fullkomin matur til að taka með sér í útilegur eða í grillveislur til vina eða fjölskyldu.

Ég elska hefðbundnar pylsur með tómatsósu, steiktum lauk og sinnepi en finnst einnig alveg ótrúlega skemmtilegt að leika mér með mismunandi hráefni og matreiða pylsurnar á ólíka vegu. Það má breyta réttinum alveg með því að setja aðrar sósur eða góð salöt á pylsurnar. Það má undirbúa öll hráefnin í þessari færslu fyrirfram þar sem þau eru öll mjög einföld og taka með sér í lautarferð eða hvar sem planið er að grilla.

Þessi hefðbundna:

• Anamma pylsur

• Tómatsósa

• Steiktur laukur

• Sinnep (ég nota yfirleitt bæði pylsusinnep og sætt sinnep)

• Heimagert kartöflusalat (uppskrift neðst í færslunni)

• Pylsubrauð

Aðferð:

1. Útbúið kartöflusalatið eftir uppskriftinni neðst í þessari færslu.

2. Grillið pylsurnar í nokkrar mínútur á hverri hlið eða þar til þær fá fallega gylltar rákir.

3. Hitið pylsubrauðinn og raðið hráefnunum á eins og hver og einn vill.

BBQ pylsur:

• Anamma pylsur með bbq sósu

• Chilli majónes

• Grænt salat

• Hrásalat

Aðferð:

1. Byrjið á því að útbúa hrásalat, uppskriftina af því má finna neðst í þessari færslu.

2. Pennslið pylsurnar með bbq sósu og grillið í nokkrar mínútur á hvorri hlið eða þar til pylsurnar frá fallegar rákir.

3. Hitið pylsubrauðin og raðið hráefnunum í eftir smekk.

Þessi mexíkóska:

• Anamma pylsur

• Mangósalsa (uppskrift neðst í færslunni)

• Guacamole (uppskrift neðst í færslunni)

• Grænt salat

• Sýrður rjómi

• Svart Doritos

Aðferð:

1. Byrjið á því að útbúa mangósalsað og guacamole sem er hér neðst í færslunni.

2. Grillið pyslurnar í nokkrar mínútur á hvorri hlið þar til þær fá fallegar gylltar rákir.

3. Hitið pylsubrauðin og raðið hráefnunum í eftir smekk.

Kartöflusalat

• 500 gr kartöflur

• 2 dl vorlaukur (einnig hægt að nota blöndu af venjulegum lauk og graslauk)

• 3/4 dl vegan majónes

• 1 dl Oatly sýrður rjómi

• 1 msk gróft sinnep

• 2 tsk sítrónusafi

• salt og pipar

Aðferð:

1. Skerið kartöflurnar í litla bita og gufusjóðið í 20 mínútur. Það er líka alveg hægt að sjóða kartöflurnar venjulega og flysja og skera niður þegar þær hafa kólnað.

2. Saxið vorlaukinn og blandið öllu nema kartöflunum saman í skál. Setjið kartöflurnar út í þegar þær hafa kólnað alveg.

3. Berið fram með hverju sem er, en salatið passar auðvitað sérstaklega vel með öllum grilluðum mat.

Hrásalat

• 1 dl vegan majónes

• 1 dl þunnt skorið hvítkál

• 1 dl þunnt skorið ferskt rauðkál

• 2 litlar eða 1 meðalstór gulrót

• 1 tsk agave síróp

• Salt eftir smekk

Aðferð:

1. Skerið hvítkálið og rauðkálið í mjög þunnar sneiðar.

2. Rífið niður gulræturnar.

3. Blandið öllum hréfnum saman í skál. Saltið eftir smekk

Mangó salsa

• 1 dl niðurskorið mangó

• 1 dl niðurkorið papríka

• 1/2 dl niðursaxaður rauðlaukur

• safi úr hálfri lime

• Salt eftir smekk

• Ferskt kóríander eftir smekk (má sleppa)

Aðferð:

1. Skerið niður grænmetið og mangóið í litla bita.

2. Blandið öllum hráefnum saman í skál.

3. Saltið eftir smekk.

Guacamole

• 2-3 stór avocado

• 1/2 hvítlauksgeiri

• 1 tómatur

• 1/2 lítill rauðlaukur

• Salt og pipar eftir smekk

• Safi úr 1/2 lime

• Ferstk kóríander (má sleppa)

Aðferð:

1. Byrjið á því að stappa avocadoin vel saman með gaffli

2. Saxið niður tómat og rauðlauk og pressið hvítlauk

3. Blandið öllum hráefnum saman við avocadómaukið og hrærið vel saman.

4. Saltið og piprið eftir smekk

- Þessi færsla er unnin í samstarfi við Anamma á Íslandi -

Ofnbakað pasta með rauðu pestói

Nú þegar fer að hausta er ég í algjöru stuði til að gera góða ofn og pottrétti. Það er svo ótrúlega þægilegt að geta sett öll hráefnin í eitt mót eða stóran pott og eldað það saman. Mér finnst einnig mjög mikilvægt að kunna að gera góða rétti sem þarfnast lítillar fyrirhafnar og elda sig sjálfir, sérstaklega þegar mikið er að gera og lítill tími gefst í eldamennsku.

Svokallað “Í einn pott” pasta eða” One pot pasta” líkt og það er kallað á ensku er tilvaldin svoleiðis réttur. Þessir réttir hafa notið mikilla vinsælda síðustu ár þar sem þeir eru svo einfaldir og elda sig alveg sjálfir. Þá er hrátt pasta, vatn og fleiri hráefni sett saman í eldfast mót eða pott og því leyft að malla þar til pastað er soðið og rétturinn tilbúin.

Í þessari viku ætla ég akkúrat að deila með ykkur slíkri uppskrift en það má segja að þetta sé hinn fullkomni hversdagsréttur. Ég ákvað að elda réttin í eldföstu móti í ofni í stað þess að gera það í potti á hellu, einfaldlega vegna þess að mér finnst það þægilegra og uppvaskið eftir það auðveldara heldur en hitt. Það eina sem þarf að gera er að hræra öllu saman í form og skella í ofninn. Þá þarf ekki að hafa neinar áhyggjur að það sjóði uppúr eða að eitthvað brenni við botninn á pottinum.

Ég ákvað að setja smá vegan ost yfir réttinn í lokin til að gera hann extra djúsí en það má alveg sleppa því. Ég notaði rauða pestóið frá Sacla Italia þar sem það er lang uppáhalds pestóið mitt. Það er þó alveg hægt að leika sér með réttinn eins og hver og einn vill, nota til dæmis grænt pestó og það grænmeti sem til er. Þetta getur verið alveg fullkomin réttur til að nota restar úr ísskápnum í.

Hráefni

• 350 gr pasta

• 3 hvítlauksrif

• 1/2-1 rauð paprika

• 1/2 krukka svartar ólífur

• 1/2 meðalstór haus brokkolí

• 1/2 dl næringarger

• 1 krukka rautt pestó úr vegan línunni hjá Sacla Italia

• 750 ml grænmetissoð

  • 750 ml vatn + 2 grænmetisteningar hitað saman

• 2-3 lúkur af vegan rifnum osti (má sleppa)

Aðferð:

1. Hitið ofninn í 200°C.

2. Byrjið á því að setja vatn og grænmetisteninga í pott og hita þar til suðan kemur upp. Hrærið aðeins í og slökkvið undir um leið og fer að sjóða.

3. Skerið allt grænmeti og ólífur niður og saxið hvítlaukinn.

4. Setjið allt hráefni, nema ostinn, í eldfast mót og blandið því vel saman.

5. Setjið álpappír yfir mótið og eldið í ofninum í 30 mínútur, takið síðan álpappírinn af og setjið ostinn yfir og bakið í 15 mínútur í viðbót.

6. Þegar ég tek réttinn úr ofninum finnst mér best að hræra öllu vel saman og blanda ostinum við réttinn sjálfan en það þarf ekki að gera það.

- Færslan er unnin í samstarfi við Sacla Italia á Íslandi. -

Möffins með kanilmulningi og glassúr

Góðan daginn!

Ég vona að þið hafið það gott. Sjálf sit ég inni í eldhúsi og drekk fyrsta kaffibolla dagsins. Það er föstudagur og ágúst er hálfnaður. Sumarið hefur verið gott. Hér í Piteå hefur sólin skinið nánast allt sumarið og eins og heima á Íslandi er bjart allan sólarhringinn. Á meðan ég fagna sumrinu á hverju ári eftir langan veturinn þá verð ég að viðurkenna að ég hlakka mikið til haustsins. Þegar það kólnar örlítið og loftið verður ferskt og frískandi. Þegar laufin verða gul og rauð ég get aftur farið að nota þykku peysurnar mínar. Uppskrift dagsins er einmitt innblásin af þrá minni eftir haustinu. Möffins með kanilsykurshvirfli (swirl), toppaðar með kanilmulningi og glassúr.

Eins og ég sagði í síðustu færslu er ég aldrei jafn hugmyndarík í eldhúsinu og á haustin og fram að jólum. Ég get ekki alveg útskýrt hvað það er. Á sumrin er ég yfirleitt alveg hugmyndasnauð og síðan þegar líður að haustinu fer hausinn í gang. Ég þarf að finna leið til að viðhalda þessu frjóa hugmyndaflugi allt árið.

Þessar möffins eru dúnmjúkar og “flöffy” með krispí krömbli, eða mulningi, sem er virkilega hin fullkomna blanda að mínu mati. Að lokum eru þær svo toppaðar með vanilluglassúr. Að hugsa sér að fyrir minna en tíu árum hafi fólk haldið að erfitt væri að baka góðar vegan kökur og tertur. Það er sem betur fer liðin tíð!

Við erum farnar að skipuleggja uppskriftir haustsins og ég spurði á instagram í gær hvað lesendur okkar vilja sjá á blogginu. Þar fengum við mikið af skemmtilegum hugmyndum sem við erum búnar að skrifa hjá okkur. En við skulum vinda okkur að gómsætu möffinskökunum.

Möffins (12 kökur):

• 5 dl hveiti

• 2 og 1/2 dl sykur

• 1 msk lyftiduft

• 1/2 tsk salt

• 2 tsk vanillusykur - eða vanilludropar

• 1 dl bragðlaus matarolía

• 4 dl haframjólk (önnur jurtamjólk virkar líka. Bætið við eftir þörf ef deigið er alltof þykkt)

Kanilsykursblanda:

• 1 dl púðursykur

• 1 msk kanill

Kanilmulningur

• 2 dl hveiti

• 1 dl púðursykur

• 1 msk kanill

• 6 msk bráðið smjörlíki

Glassúr:

• 3 dl flórsykur

• 2-3 msk haframjólk (eða önnur jurtamjólk)

• 1 tsk vanillusykur

• örlítið salt

Aðferð:

1. Hitið ofninn í 200°c

2. Byrjið á því að búa til kanilsykursblönduna og mulninginn og leggið til hliðar. Bæði er gert með því að blanda hráefnunum í skálar.

3. Gerið möffinsdeigið með því að blanda saman þurrefnunum í stóra skál, bæta mjólkinni og olíunni saman við og hræra með höndunum. Það er alveg óþarfi að nota rafmagnsþeytara eða hrærivél. Ég nota písk og reyni að hræra ekkert alltof mikið svo kökurnar verði sem mjúkastar.

4. Leggið möffins pappírform í möffinsskúffu eða á ofnplötu ef þið eigið ekki svona möffinsskúffuform.

5. Fyllið formin að hálfu með deigi, deilið svo kanilsykursblöndunni niður í formin og hellið möffinsdeigi yfir þar til formið er sirka 3/4 fullt.

6. Deilið mulningnum niður í formin og munið að það mun líta út fyrir að þetta sé svakalega mikið en það mun ekki líta svoleiðis út þegar kökurnar eru bakaðar.

7. Bakið í 12-18 mínútur eða þar til tannstöngull kemur hreinn út úr kökunum þegar stungið er í þær.

8. Útbúið glassúrinn á meðan kökurnar kólna með því að blanda saman hráefnunum í skál. Hellið honum svo yfir kökurnar þegar þær hafa kólnað aðeins.

Takk fyrir að lesa og vona að ykkur líki vel!

-Helga María

Tómatgalette með hvítlauk og rjómaosti

Hæ! Ég vona að þið hafið það gott og séuð að njóta þess síðasta af sumrinu. Persónulega get ég ekki beðið eftir haustinu, en það er mín uppáhalds árstíð. Á haustin er ég sem mest skapandi í eldhúsinu og haustlegar súpur og pottréttir eru eitthvað sem ég get borðað endalaust af. Í dag ætla ég þó ekki að deila með ykkur súpu heldur unaðslega góðri tómatgalette með rjómaosti og hvítlauk sem ég hef heldur betur beðið spennt eftir að geta birt hérna á blogginu. Galette er franskt orð yfir flata böku. Eða ég skil það svoleiðis, þið megið endilega leiðrétta mig ef ég hef rangt fyrir mér.

Ég elska bökur og galette er virkilega einföld tegund af böku. Það þarf að hafa nokkra hluti í huga þegar botninn er gerður, en þrátt fyrir það er auðvelt að útbúa hann. Það sem mér þykir kostur við galette bökur er að þær mega gjarnan líta svolitið heimagerðar og frjálslegar út. Það er algjörlega óþarfi að reyna að gera þær fullkomnar.

Uppskrift dagsins er unnin í samstarfi með Violife á Íslandi og ég notaði bæði hvítlauks- og jurtarjómaostinn þeirra og epic mature cheddar ostinn. Já, sum ykkar munið kannski eftir því að ég nefndi það í færslu um daginn að ég finni hvergi epic mature ostinn hérna í Piteå. Fyrir nokkrum vikum hljóp ég inní matvöruverslun í bænum Skellefteå, sirka klukkutíma frá Piteå, til að kaupa mér eitthvað að drekka. Þar rak ég augun í ostinn góða og keypti hvorki meira né minna en fimm stykki. Nú er ég að klára þann síðasta svo ég þarf kannski að gera mér ferð þangað aftur hehe.. Epic mature cheddar er minn uppáhalds ostur og passar virkilega vel á bökuna með rjómaostinum og tómötunum. Mæli virkilega með.

Sjáið alla þessa fallegu liti. Ferskir tómatar í öllum stærðum og gerðum.

Eins og ég sagði hér að ofan er alger óþarfi að reyna að gera bökuna fullkomna. Ég brýt hana bara einhvernveginn yfir kantinn og hún verður alltaf fullkomlega ófullkomin.

Uppskrift

Botninn

• 3 og 1/2 dl hveiti

• 1 tsk salt

• 120 g kalt smjörlíki

• sirka 1/2 dl ísvatn (ég byrja á 1/2 dl bæti svo við tsk eftir þörfum. Og já ísvatn= vatn með klökum)

• 1 msk eplaedik

Aðferð:

1. Blandið saman hveiti og salti.

2. Skerið smjörið í litla teninga og myljið saman við hveitið með höndunum þar til klumparnir eru á stærð við litlar baunir.

3. Látið klaka liggja í vatninu þar til það er ískalt. Sigtið klakana frá og byrjið á því að hræra 1/2 dl saman við deigið með gaffli ásamt eplaedikinu.

4. Hellið blöndunni á borð og vinnið með hönunum. Bætið við vatni í tsk þar til þið fáið þétt deig úr blöndunni. Vinnið ekki of mikið.

5. Mótið kúlu og vefjið í plastfilmu og setjið í kæli í 1-2 klst.

Fylling:

• 500 gr ferskir tómatar

• 2-3 hvítlauksgeirar

• 100 gr jurta- og hvítlauksrjómaostur frá Violife

• Epic mature cheddar ostur eftir smekk. Ég reif niður svo að hægt var að þekja stóran hluta bökunnar. Mæli ekki með því að hafa of þykkt lag af osti því það er frekar mikið af rjómaosti. Held ég hafi notað sirka 1/4 af oststykkinu

• Salt og pipar

• Ferskar jurtir til að toppa með (ég notaði basiliku og smá timían)

• Sítrónusafi til að toppa með

• Chiliflögur (má sleppa)

Aðferð:

1. Stillið ofninn á 190°c.

2. Fletjið út deigið svo að það verði sirka kringlótt.

3. Smyrjið rjómaosti yfir deigið en skiljið eftir smá kant. Ég hef ekkert á móti því að hafa örlítið af rjómaosti í skorpunni.

4. Stráið osti yfir.

5. Skerið tómatana í sneiðar og hvítlaukinn líka. Raðið tómötunum á eldhúspappír og saltið. Leyfið þeim að standa í 5-10 mínútur og þurrkið svo safann af sem myndast. Þetta er gert svo það myndist ekki of mikið af tómatsafa í bökunni. Raðið yfir ostinn ásamt hvítlauknum. Athugið að það mun líta út fyrir að þetta sé svakalega mikið magn af tómötum en þeir munu minnka í ofninum svo ekki hafa áhyggjur af því.

6. Saltið og piprið.

7. Bakið bökuna í sirka 30 mínútur eða þar til hún er gyllt að ofan. Það fer svolítið eftir ofnum hversu langan tíma þetta tekur. Ég bakaði mína í um 30 mínútur á blæstri en í gamla ofninum tók það næstum 40 mínútur. Ég myndi byrja að fylgjast með bökunni eftir 20 mín.

8. Takið bökuna út og kreistið yfir hana smá sítrónusafa og stráið chiliflögum yfir ef þið viljið.

9. Berið fram með ferskum jurtum. Ég mæli líka með að hafa klettasalat og vegan sýrðan rjóma.

Takk fyrir að lesa og vonandi líkar ykkur vel!

-Helga María

-Þessi færsla er unnin í samstarfi við Violife á Íslandi-

Quesadilla með brúnum linsum og nýrnabaunum

Í þessari viku deilum við með ykkur frábærri uppskrift af quesadilla sem tekur sirka 10 mínútur að útbúa. Við fengum í hendurnar nýlega baunir frá nýju merki sem heitir Oddpods sem ég notaði í uppskriftina en þær eru virkilega góðar. Baunirnar koma ólíkt flestum forsoðnum baunum ekki í niðursuðu krukku heldur í fallegum pokum og þær eru tilbúnar til matar beint úr pokanum. Þar af leiðandi eru þær ekki geymdar í vökva og halda því næringarefnum betur og innihalda engin aukaefni.

Þessi réttur er alveg lygilega góður miðað við hvað hann er einfaldur og fljótlegur. Það tók mig um 10 mínútur frá því ég byrjaði þar til þetta var komið á borðið. Ég notaði brúnu linsurnar og nýrnabaunirnar í réttin en það má í rauninni nota hvaða baunir sem er en OddPods bíður einnig upp á kjúklingabuanir, gular linsur og “chana dal” baunir. Baunirnar frá OddPods má nálgast í Nettó.

Hráefni

• 1 pakki brúnar linsur frá OddPods

• 1 pakki nýrnabaunir frá OddPods

• 1/2 rauðlaukur

• 1/2 krukka salsasósa

• 1/4 rauð paprika

• mexíkósk kryddblanda eða kryddin hér að neðan

  • 1/2 tsk cumin

  • 1/2 tsk paprika

  • 1/2 tsk laukduft

  • 1 tsk blandaðar jurtir

  • salt

• safi úr 1/2 lime

• Vegan ostur

• 1 pakki tortilla pönnukökur

Aðferð:

1. Setjið baunirnar í skál og stappið þær aðeins með gaffli.

2. Saxið grænmetið smátt niður og blandið saman við baunirnar ásamt salsasósunni og kryddunum saman við.

3. Setjið smá ost á hverja pönnuköku of smyrjið fyllingu á helmingin. Brjótið pönnukökurnar saman og grillið í panini grillið eða steikið á hvorri hlið í nokkrar mínútur á pönnu.

Berið fram með sýrðum rjóma og avocado salati.

- Þessi færsla er unnin í samstarfi við Oddpods á Íslandi hjá Danól heildsölu -

Hamborgarar með frönskum og pikkluðu chilli

Í dag deili ég með ykkur uppskrift af borgurum sem eru fullkomnir fyrir helgina! Sjálfir borgararnir eru djúsí og góðir, og henta bæði til steikingar og til að grilla, en til að gera þá enn ómótstæðilegri toppaði ég þá með chilimajó, djúpsteiktum strimluðum frönskum og pikkluðu chili. Þið trúið því ekki hversu gott þetta var!

Uppskrift dagsins er í samstarfi við Anamma, en borgarana útbjó ég úr “formbar” hakkinu frá þeim. Munurinn á því sem heitir formbar og því hefðbundna er að hið fyrra hentar einstaklega vel í að búa til hamborgara, bollur og annað sem krefst þess að maður móti eitthvað úr hakkinu. Það virkar þó líka að steikja það beint úr pokanum og ég geri það sjálf oft líka. Þessvegna á ég alltaf til poka af formbar färs í frystinum.

Það hefur aldrei verið jafn auðvelt að útbúa góða vegan borgara og í dag. Þegar ég varð vegan fyrir 10 árum (já, það eru komin 10 ár síðan!!) þá var grænmetisbuff með tómatsósu og sinnepi það sem við grænkerarnir borðuðum í stað borgara. Ég vissi heldur ekki á þeim tíma hversu hlægilega auðvelt það er að gera vegan mæjónes svo allar gómsætar sósur hurfu af mínum matseðli í nokkur ár.

Ég á ekki grill svo ég steikti borgarana á steypujárnspönnunni minni, en það er svakalega gott að skella þeim á grillið!

Ég var í stuði til að prófa eitthvað nýtt og spennandi og ákvað að útbúa þunnar franskar til að hafa á borgaranum. Á ensku heita þær shoestring fries eða skóreimafranskar (hehe). Þær eru ekkert smá krispí og góðar og eru bæði geggjaðar á borgarann og til að bera fram með.

Ég útbjó einnig pikklað chili. Ég hef verið með æði fyrir að pikkla allskonar og ísskápurinn fullur af pikkluðu grænmeti. Mæli virkilega með.

Ég vona að þið prófið þessa dásamlegu borgara, þeir eru hin fullkomna grilluppskrift fyrir sumarið.

Borgararnir

Hráefni:

• 500 gr formbar hakkið frá Anamma

• 1 msk laukduft

• 1 msk hvítlauksduft

• 1-2 tsk sojasósa

• 1 tsk gróft sinnep eða dijon sinnep

• 1 tsk paprikuduft

• salt og pipar

• 1 tappi liquid smoke. Það er hægt að skipta því út fyrir 1 tsk reykt paprikuduft. Ef þið gerið það er óþarfi að hafa venjulegt paprikuduft

Aðferð:

1. Takið hakkið úr frysti um það bil klukkutíma áður en matreiða á borgarana.

2. Setjið öll kryddin út í þegar hakkið hefur aðeins fengið að þiðna.

3. Mótið 4-5 buff út hakkinu (fer eftir því hversu þykka þið viljið hafa þá) og steikið eða grillið í nokkrar mínútur á hvorri hlið.

Shoestring franskar

Hráefni

• Ferskar kartöflur eftir smekk. Fer algjörlega eftir því hversu margir ætla að borða. Ég útbjó franskar úr 6 stórum kartöflum og fékk frekar mikið úr þeim.

• 1 líter olía til að djúpsteikja með

• salt og pipar eða frönsku krydd. Ég blanda yfirleitt saman hvítlauksdufti, laukdufti, reyktri papriku, þurrkaðri steinselju, salti og pipar og strái yfir.

Aðferð:

• Hitið olíu í stórum potti í 180°c

• Skrælið kartöflurnar og rífið niður gróft. Ég nota svona julienne eins og þið sjáið á myndinni. Annars myndi ég skera niður mjööög þunnt með hníf bara.

• Djúpsteikið hluta af kartöflunum í einu í hrærið varlega til að aðskilja þær í pottinum. Djúpsteikið í sirka 2-3 mínútur eða þar til þær eru orðnar gylltar og fínar.

• Veiðið upp með sleif með götum og leggið á disk með eldhúspappír. stráið kryddinu yfir.

Pikklað chili

• 5-6 fersk rauð chili

• 2 dl vatn

• 1 dl edik

• 1/2 dl sykur

• örlítið salt

Aðferð:

1. Byrjið á því að skera niður chili. Ég hafði steinana með en takið þá úr ef þið viljið ekki hafa þetta mjög sterkt.

2. Setjið vatn, edik og sykur í pott og leyfið því að hitna á hellu þar til sykurinn leysist upp.

3. Setjið chili í glerkrukku og hellið blöndunni yfir og látið standa uppá borði þar til það hefur kólnað. Hægt að borða svo eftir svona klukkutíma.

4. Geymist í ísskáp í 2 vikur.

Chilimæjó

• Heimagert vegan mæjó eða keypt út í búð (Uppskrift af mæjóinu hér að neðan)

• Sambal Olek

1. Blandið saman og smakkið til. Hægt að salta smá í lokinn.

Vegan mæjónes:

• 1 bolli ósæt sojamjólk (helst við stofuhita.) Ég nota þessa í rauðu fernunni frá Alpro, en svo er einnig til mjög góð frá Provamel, einnig í rauðri fernu

• 2 tsk eplaedik

• Bragðlaus olía eftir þörf. Ég nota sólblómaolíu eða rapsolíu

• 1 tsk gróft sinnep

• 1/2 tsk salt

1. Hellið sojamjólkinni í blandara eða matvinnsluvél ásamt eplaedikinu og hrærið á miklum hraða í nokkrar sekúndur

2. Hellið mjórri bunu af olíu ofan í á meðan blandarinn vinnur. Ég hefði átt að mæla fyrir ykkur hvað ég notaði mikla olíu, en ég gleymdi því. Ég nefnilega helli henni beint úr flöskunni í mjórri bunu þar til mæjónesið er orðið eins þykkt og ég vil hafa það. Það er mikilvægt að hella henni hægt svo þetta tekur alveg mínútu.

3. Þegar mæjóið er orðið þykkt bæti ég sinnepinu og saltinu útí og hræri í nokkrar sekúndur í viðbót.

Takk fyrir að lesa og vonandi smakkast vel!

-Helga María

-Þessi uppskrift er í samstarfi við Anamma á Íslandi-

Uppáhalds grillmeðlætið okkar

Við systur höldum áfram að deila með ykkur uppáhalds grill uppskriftunum okkar en nú er komið að uppáhalds grill meðlætinu okkar. Okkur systrum finnst svo gaman að grilla og ennþá skemmtilegra að njóta matarins með góðum vinum eða fjölskyldu. Í þessari færslu deilum við með ykkur þremur réttum sem henta sem meðlæti með grillmatnum eða sem geggjaðir forréttir sem munu alltaf slá í gegn.

Við elskum að nota ferskt og gott grænmeti á grillið og er það uppistaðan í öllum smáréttunum sem koma hér á eftir. Það er ekkert smá auðvelt að gera ótrúlega ljúffenga grillrétti með einföldum hráefnum og fær grænmetið í þessum réttum að njóta sín ótrúlega vel.

Grillaður chilli maís með vegan parmesan

• 2 ferskir maísstönglar

• Chilliolía

  • 1/2 dl góð ólífuolía

  • 1 tsk chillikrydd

  • 1/2 tsk paprikukrydd

  • 2 tsk blandaðar jurtir

  • 1/2 tsk laukduft

  • 1/2 tsk hvítlauksduft

  • 1 tsk salt

• Heimagerður vega parmesan

  • 1 dl kasjúhnetur

  • 1 tsk laukduft

  • 1 tsk hvítlauksduft

  • 2 tsk salt

  • 2-3 msk næringarger

• Oatly sýrður rjómi

Aðferð:

1. Byrjið á því að taka vel utan af maísstönglunum og passið að fjarlæga alla “strengina” vel. Byrjið á því að sjóða maísstönglana í 10 mínútur í stórum potti. Gott er að salta vatnið vel.

2. Á meðan er gott að undurbúa chilliolíuna, en einungis þarf að blanda öllum hráefnunum fyrir olíuna saman í skál og setjið til hliðar.

3. Setjið öll hráefnin fyrir parmesan ostinn í blandara eða matvinnsluvél og blandið þar til hráefnin verða að fínu dufti. Setjið til hliðar.

4. Grillið maísstönglana þar til þeir verða fallega gylltir eða fá smá “brennda” bletti hér og þar.

5. Penslið olínnu á maísinn um leið og hann kemur af grillinu og veltið þeim síðan upp úr heimagerða parmesan ostinum.

6. Berið fram með vegan sýrðum rjóma.

Grillaðar kartöflur með chilli majónesi og chorizo pylsum

• 2 stórar grillkartöflur

• Vegan smjör

• Salt

• Chilli majónes (keypt eða heimagerð)

  • 2 dl vegan majónes

  • 1-2 tsk sambal oelek (chillimauk)

• 1 vegan Chorizo pylsa

• Graslaukur

Aðferð:

1. Mér finnst best að byrja á því að sjóða kartöflurnar í 20 mínútur þar sem það tekur óratíma að grilla stórar kartöflur.

2. Vefjið hvorri kartöflu inn í álpappír ásamt klípu af vegan smjöri og salti

3. Grillið kartöflurnar í álpappírnum í 15 mínútur, gott er að snúa þeim af og til.

4. Hrærið saman majónesinu og chillimaukinu fyrir heimagert chillimajó

5. Skerið chorizo pylsuna í litla bita og steikið í 2-3 mínútur upp úr olíu á vel heitri pönnu.

6. Skerið ofan í kartöflurnar, setjið klípu af vegan smjöri og smá salt ofan í og stappið því aðeins saman við kartöfluna. Dreifið chilli majónesinu, chorizo pylsubitunum og niðurskornum graslauk yfir og berið fram.

Vatnsmelónu grillsalat

• 1/2 stór vatnsmelóna

• 1 gúrka

• 1/2 rauðalukur

• safi úr 1/2 lime

• örítið salt

• Niðursöxuð mynta (má sleppa)

Aðferð:

1. Skerið vatnsmelónuna, gúrkuna og rauðlaukinn niður í þá stærð sem þið kjósið.

2. Blandið saman í skál og hellið safanum af límónunni yfir. Setjið salt og myntu saman við og blandið vel saman.

3. Berið fram með öllum grillmat eða sem forréttur fyrir hvaða mat sem er.

-Njótið vel

Þessi færsla er unnin í samstarfi við Krónuna og fást öll hráefnin þar

Tómatsúpa og grillaðar samlokur

Í dag deilum við með ykkur uppskrift af gómsætri tómatsúpu og grilluðum samlokum. Ég er ein af þeim sem get borðað súpu allan ársins hring. Það skiptir ekki máli hvort það er snjóstormur eða sumarblíða, súpa er alltaf uppáhalds.

Í súpuna notaði ég meðal annars ferska tómata, tómata í dós, fullt af hvítlauk, lauk og ferskar jurtir. Það sem gerir súpuna síðan rjómakennda er vegan matreiðslurjómi og rjómaosturinn frá Violife. Uppskriftin er í samstarfi við Violife og ég notaði rjómaostinn frá þeim í bæði súpuna og samlokurnar, en í þær notaði ég svo líka hefðbundna ostinn frá þeim.

Íslendingar búa svo vel við að geta valið á milli ýmissa bragðtegunda af Violife vörunum. Þar sem ég bý erlendis hef ég ekki sama úrval og þessvegna nota ég “original” af bæði ostinum og rjómaostinum. Ég mæli þó með því fyrir ykkur að prófa eitthvað af hinum bragðtegundunum ef þið komist í þær. Í súpuna hefði jafnvel verið gott að nota hvítlauks- og jurtarjómaostinn í súpuna og kannski hot peppers í grilluðu samlokurnar. Ég elska allar vörurnar frá Violife en síðast þegar ég var á Íslandi smakkaði ég þann besta ost sem ég hef smakkað frá þeim og hann heitir Epic mature cheddar flavor. Ef þið hafið ekki smakkað hann mæli ég með því að þið gerið það strax í dag. Ég vildi óska að ég fengi hann hérna í norður Svíþjóð!

Ég vona að þið smakkið, þó það sé sumar og sól. Gómsæt súpa er einhvernveginn alltaf jafn góð!

Tómatsúpa

Hráefni:

• 500 gr ferskir tómatar

• 5-6 hvítlauksgeirar

• 1 laukur

• Ferskt timían ca 2-3 msk

• 6 blöð fersk salvía

• 3 msk ólífuolía

• 2 dósir niðursoðnir tómatar

• 1 grænmetisteningur

• 2 dl vegan matreiðslurjómi

• 1 pakki rjómaostur frá Violife

• 1 msk balsamikedik

• 1 tsk sykur (bætið við meiru ef ykkur finnst vanta. Má líka sleppa sykrinum ef ykkur finnst hann óþarfur)

• salt og pipiar

• chiliflögur eftir smekk

• fersk basilika til að toppa með

Aðferð:

1. Hitið ofninn í 210°c

2. Setjið ferska tómata, hvítlauk, lauk, jurtir, ólífuolíu, salt og pipar í pott eða eldfastmót og inní ofninn og bakið í 30 mínútur. Ég á steypujárnspott svo ég gerði allt saman bara í honum.

3. Bætið tómötum í dós samanvið og mixið aðeins með töfrasprota eða í blandara þar til þið fáið þá áferð sem þið kjósið. Ég mæli með að setja smá vatn í botninn á dósinni til að ná með restinni af tómötunum og það sakar ekki að fá smá vatn með í súpuna. Mér finnst gott að hafa smá “chunks” í súpunni minni svo ég passaði mig að blanda hana ekki of mikið.

4. Færið pottinn á hellu og bætið saman við grænmetiskraftinum, matreiðslurjómanum, rjómaostinum, balsamikediki, sykri og kryddum. Leyfið súpunni að malla í nokkrar mínútur og smakkið til. Saltið meira ef ykkur finnst þurfa.

Grillaðar samlokur

Hráefni

• Gott brauð

• vegan smjör eða olía til að smyrja brauðið að utanverðu

• Rjómaostur frá Violife, mæli með original, garlic & herbs eða Hot peppers

• Ostur frá Violife

Aðferð:

1. Smyrjið brauðsneiðarnar að utanverðu með smá vegan smjöri eða ólífuolíu.

2. Smyrjið svo rjómaostinum á og bætið við eins miklum osti og ykkur lystir.

3. Grillið í samlokugrilli eða steikið á pönnu þar til osturinn bráðnar og brauðið fær á sig gylltan lit.

4. Berið fram með súpunni. Mér finnst geggjað að dýfa samlokunum í súpuna.

Takk fyrir að lesa og vonandi líkar ykkur vel!

-Færslan er í samstarfi við Violife á Íslandi-

Nektarínu grillbaka á hvolfi

Grill eftirréttir finnst mér alltaf jafn skemmtilegir. Ég hugsa að ég noti aldrei jafn mikið af ákvextum í eftirrétti og þegar ég er að gera rétt á grillinu. Grillaðir ávextir eru svo ótrúlega góðir og verða eitthvað svo extra sætir og safaríkir. Ég elska að henda banönum og ananas sneiðum á grillið og borða með góðum ís og kannski súkkulaði en það er svo þægilegur og einfaldur eftirréttur.

Þessi baka er ekki síður auðveld og svo er hún svo ótrúlega falleg þegar búið er að hvolfa henni. Mesta snilldin við hana er að það er hægt að nota hvaða ávexti með hugurinn girnist. Mér finnst passa fullkomlega að nota epli, perur eða góð ber en í þetta skipti deili ég með ykkur uppskrift þar sem ég nota nektarínur. Það er hægt að fá nektarínur í öllum búðum akkúrat núna og þær passa svo vel í þennan rétt. Þær verða svo safaríkar og sætar þegar þær bakast á grillinu.

Þessi baka er einnig svo mikil snilld þar sem notast er við keypt deig og niðurskorna ávexti svo það er auðvelt að skera ávextina niður og setja í box, kaupa deigið og taka þetta með sér hvert sem er. Bakan er bökum í álbakka en það þarf að passa vel að kaupa ekki álbakka með götum því þá mun allur safi leka niður í grillið. Ég ber kökuna fram með góðm vegan ís en akkúrat núna er ísinn frá Jude´s sem fæst í Krónunni í rosalega miklu uppáhaldi hjá mér svo ég notaðist við vanilluísinn frá þeim. Það má alveg vera með bragðmeiri ís með eða bæta jafnvel súkkulaði með í bökuna. Ef það er gert þarf að passa að setja súkkulaðið ekki neðst í bakkan því þá gæti það brunnið. Það er best að strá því yfir ávextina áður en deigið er sett yfir.

Hráefni:

• 5-6 nektarínur

• 1 askja hindber

• 1 askja brómber

• 1/2 dl sykur

• 1 pakki upprúllað smjördeig úr Krónunni.

Aðferð:

1. Skolið og skerið niður nektarínurnar.

2. Setjið alla ávextina í skál og stráið sykrinum yfir og blandið saman (þessu má alveg sleppa þar sem ávextirnir verða mjög sætir á grillinu. Mér finnst bakan þó verða extra gómsæt ef það er settur smá sykur).

3. Hellið ávextunum í álbakka og dreifið vel úr.

4. Rúllið út deiginu og stingið í það nokkur göt með gaffli. Leggið deigið yfir álbakkan og skerið meðfram bakkanum. Klemmið deigið aðeins við kanntana á bakkanum.

5. Setjið grillið á meðallága stillingu og hafið grillið sem mest lokað á meðan bakan er á grillinu. Bakið í 15 til 20 mínútur eða þar til deigið verður fallega gyllt að ofan.

6. Takið bökuna af grillinu og leyfið henni að standa í 5-10 mínútur áður en henni er hvolft á disk. Best er að setja bakkan á stóran disk og setja annan stóran disk yfir og hvolfa bökunni þannig.

7. Berið fram með góðum vegan ís eða vegan þeyttum rjóma.

-Njótið vel.

Þessi færsla er unnin í samstarfi við Krónuna.

Grillspjót með grænmeti og tófú, og köld piparsósa

Við erum loksins farin að finna fyrir smá sumri hérna í höfuðborginni og sjá smá sól en það er fátt sem mér finnst betra þegar það sést í sól en að grilla. Grillmatur er bara eitthvað svo einstaklega góður og stemmingin við að grilla er engu lík. Ég hef alltaf verið mjög dugleg að prófa nýja rétti á grillið á sumrin og er það svo sannarlega ekkert mál að gera góðan vegan grillmat. Það er hægt að finna fullt af góðum hamborgurum og pylsum eða öðrum vegan “kjöt” vörum í búðum í dag og er alls konar grænmeti einnig einstaklega gott á grillinu.

Í þetta skiptið ætla ég hins vegar að deila með ykkur, í samstarfi við Krónuna, ótrúlega góðum grillpinnum með alls konar grænmeti og tófú. Tófú er snilldar hráefni sem passar í alls konar rétti þar sem það er tiltölulega bragðlítið eitt og sér en ef það er marinerað dregur það í sér bragðið af marineringunni. Það passar því alveg ótrúelga vel á grillið þar sem grillmarinergingar er algjört lykilatriði oft í grillmat. Ég notaðist við gómsæta sítrónu og kryddjurta marinerignu en hún passar fullkomlega með grænmeti og tófu. Það má nota allt það grænmeti sem manni dettur í hug í þessari uppskrift.

Það sem er svo þægilegt við þennan rétt er að auðvelt er að græja marineringuna í box, skera grænmetið og tófúið út í og taka þetta með sér hvort sem það er í útileguna, sumarbústað eða í grillveisluna. Þá þarf einfaldlega að þræða pinnana, skella þeim á grillið og maturinn er tilbúin. Það finnst mér alveg æði því þá þarf ekki að fara í einhverja sérstaka “eldamennsku” í útilegunni en mér finnst lang þægilegast að fara í útilegur með matinn nánast tilbúin og að þurfa ekki að undirbúa hann mikið á staðnum.

Grillpinnana ber ég fram með því meðlæti sem ég á til hverju sinni. Grillaðar kartöflur finnst mér vera algjörlega ómissandi og köld piparsósa einnig. Í þetta skiptið var ég einnig með grillaðan aspas sem ég velti aðeins upp úr ólífuolíu og salti áður en ég setti hann á grillið. Grillaður maís passað einnig mjög vel með en ef ég grilla maís þá sýð ég hann fyrst í um 10 mínútur því þá verður hann extra safaríkur. Það geri ég einnig við kartöflurnar áður en ég grilla þær.

Grillpinnar (sirka 10 spjót, fyrir 4)

• Marinering

  • 3/4 dl góð ólífuolía

  • 3/4 dl sítrónusafi (safi úr sirka 2 sítrónum)

  • börkur af 1 sítrónu

  • 3-4 hvítlauksgeirar

  • 1 msk oreganó

  • 1 msk rótargrænmetiskrydd frá pottagöldrum (eða einhvers konar blandaðar jurtir)

  • 1-2 msk ferskt timían

  • 1 tsk papríkuduft

  • 1 tsk laukduft

  • 1/2 tsk chilli duft eða chilli flögur (má sleppa)

  • 1 msk sesamfræ

• 1/2 rauð paprika

• 1/2 gul eða appelsínugul papríka

• 1 rauðlaukur

• 1 pakki kastaníusveppir

• 1 pakki tófú

Aðferð:

1. Blandið öllum hráefnunum fyrir marineringuna í stóra skál eða stórt box.

2. Skerið grænmeti og tófúið í mjög grófa bita, bitarnir eiga að vera frekar stórir svo þeir tolli vel á grillpinnunum.

3. Setjið grænmetið og tófúið út í marineringuna og veltið því vel um þar til allir bitar eru vel þakknir af kryddolíunni.

4. Leyfið þessu að liggja í marineringunni í að minnsta kosti 30 mínútur, en því meiri tíma sem þetta fær að hvíla því betra.

5. Byrjið að huga að meðlætinu en ég var með grillaðar kartöflur, aspas, blandað ferskt salat og kalda sósu með. Uppskrift af sósunni er hér fyrir neðan.

6. Takið um 10 grillpinna og leyfið þeim að liggja í vatni í 10 til 15 mínútur. Takið pinnana úr vatninu og þræðið grænmeti og tófú á þá í þeirri röð sem þið viljið.

7. Grillið í nokkrar mínútur á hverri hlið eða þar til grænmetið og tófúið fær fallegar “bruna” rákir. Við mælum með að hafa grill álbakka undir svo maturinn brenni ekki of mikið að utan.

Köld piparsósa

• 1 dl oatly sýrður rjómi eða hreint sykurlaust vegan jógúrt

• 1 dl vegan Krónu majónes

• 2 tsk grófmalaður svartur pipar

• 1/2 tsk laukduft

• 1/2 tsk salt

• 1 tsk sítrónusafi

• 1-2 msk vatn (eftir því hversu þunna þið viljið sósuna)

Aðferð:

1. Hrærið öllu saman í skál.

-Njótið vel og endilega verið dugleg að tagga okkur og krónuna ef þið hendið í vegan grillveislu með uppskriftinni þar sem okkur finnst svo ótrúlega gaman að sjá myndir frá ykkur <3

Þessi færsla er unnin í samstarfi við Krónuna.

Íssamlokur úr súkkulaðibitakökum

Í dag deilum við með ykkur uppskrift af gómsætum íssamlokum úr súkkulaðibitakökum. Uppskriftin er í samstarfi við Ben & Jerry’s á Íslandi en frá þeim fást nokkrar tegundir af vegan ís sem er virkilega góður. Fyrir ekki svo mörgum árum var ómögulegt að finna vegan ís sem ekki var frostpinni. Í dag er sem betur fer hægt að fá vegan rjómaís sem gefur ekkert eftir hvað bragð og áferð varðar. Vegan ísinn frá Ben & Jerry’s er einmitt dæmi um svoleiðis ís.

Nýbakaðar súkkulaðibitakökur og ís er kombó sem er virkilega erfitt að toppa. Ég mæli allavega með því að þið prufið! Uppskriftin af kökunum er virkilega einföld og tekur enga stund að búa þær til.

Ég hafði mínar mjög hefðbundnar og notaði suðusúkkulaði en það er hægt að breyta til og setja allskonar skemmtilegt í kökurnar, eins og hnetur, hvítt súkkulaði, eða annað sælgæti sem manni þykir gott!

Þær bragðtegundir sem ég notaði í íssamlokurnar að þessu sinni voru “Cookies on cookie dough” og “Chocolate fudge brownie”. Báðar tegundirnar eru í miklu uppáhaldi hjá mér!

Hráefni:

• 250 gr smjörlíki

• 1 dl sykur

• 1 dl púðusykur

• 1/2 dl plöntumjólk

• 1 tsk vanilludropar

• 4 1/2 dl hveiti

• 1 tsk matarsódi

• örlítið salt

• 150 gr suðusúkkulaði

• Vegan Ben & Jerry’s ís

Aðferð:

1. Þeytið saman smjörið og sykurinn í smá tíma, bætið síðan útí mjólkinni og vanniludropunum og þeytið örlítið lengur.

2. Blandið saman öllum þurrefnunum í skál og hrærið síðan saman við smjörið og sykurinn.

3. Síðast er súkkulaðið saxað og því blandað saman við deigið.

4. Rúllið kúlur úr deiginu og bakið í 7-9 mínútur við 180°C.

5. Leyfið kökunum að kólna á plötunni.

6. Setjið eina kúlu af ís á hverja köku og pressið svo aðra köku ofan á og njótið!

Takk fyrir að lesa og vonandi líkar ykkur vel!

-Veganistur

-Þessi færsla er unnin í samstarfi við Ben & Jerry’s á Íslandi-

Fylltir kleinuhringir með Violife súkkulaðismyrju

Það er ekkert betra, að mér finnst, en að eyða frídögum og helgum í að baka eitthvað gómsætt. Sérstaklega þegar ég næ að útbúa eitthvað svo einstaklega gott með einföldum hætti. Þessir fylltu kleinuhringir eru án efa ein af þeim uppskriftum sem lítur út fyrir að vera flókin en er svo bara furðu einföld þegar maður lætur vaða.

Ég notaðist ég við hefðbundnu kleinuhringja uppskriftina úr bókinni okkar sem eru svo auðveld og klikkar aldrei. Ég ákvað að fylla snúðana með nýju Violife súkkulaðismyrjunni, og guð minn góður hvað það kom VEL út. Ég vissi strax þegar ég smakkaði súkkulaðismyrjuna að ég yrði að prófa að gera eitthvað extra “djúsí” úr henni og passaði hún fullkomlega í kleinuhringina.

Þessi uppskrift er svo sannarlega orðin ein af mínum uppáhalds núna og get ég ekki beðið eftir að prófa að gera þessa kleinuhringi með alls konar mismunandi fyllingum. Mér dettur einna helst í hug að það sé gott að fylla þá með sultu eða einhverjum góðum vanillubúðing. VIð munum alveg klárlega setja inn fullt af fleiri útfærslum af þessari uppskrift í framtíðinni.

Fylltir kleinuhringir

• 4 dl plöntumjólk

• 100 gr smjörlíki

• 1 tsk vanilludropar

• 1 bréf þurrger

• 8-10 dl hveiti

• 1 dl sykur

• 1 tsk salt

• 2 l olía til steikingar

• Súkkulaðifylling:

  • 2 pakkar violife súkkulaðismyrjan

  • 2-3 msk plöntumjólk

Aðferð:

1. Hitið mjólkinu og smjörlíkið saman í pottið það til smjörlíkið er alveg bráðnað. Leyfið blöndunni að kólna þar til hún er sirka 37°C (blandan á einungis að vera volg eða við líkamshita, ekki heit)

2. Hellið mjólkinni í stóra skál, bætið vanilludropum út í og stráið þurrgerinu ásamt 1 msk af sykri yfir. Leyfið þessu að standa í um 5-10 mínútur eða þar til vökvinn fer að freyða.

3. Blandið restinni af þurrefnunum saman við. Best er að byrja á því að setja 8 dl af hveiti og bæta síðan við ef deigið er of blautt.

4. Hellið deiginu á hreint borð og hnoðið í nokkrar mínútur. Setjið aftur í skál sem viskustykki eða plastfilmu yfir og leyfið því að hefast í um klukkustund.

5. Skiptið deiginu í tvo hluta. FLetjið annan hlutan út í einu þar til það er u.þ.b. 1 cm að þykkt

6. Skerið út hring,i en notaði tvenns konar stærðir af glösum til að gera annars vegar stóra hringi og hins vegar svona “mini” útgáfu. Í stóru notaði ég hefðbundið vatnsglas en skotglas í þá minni.

7. Leggið viskastykki yfir og leyfið þeim að hvíla á meðan þið hitið olíuna.

8. Hitið olíuna í stórum potti. Mér finnst gott að athuga hvort olía sé tilbúin með því að setja smá bút af afgangs deigi út í og sjá hversu fljótur hann er að bakaðast. Lítill bútur á að fá gullitaða áferð á einungis nokkrum sekúndum. Olían á að vera um 180°C og ef þið eigið mæli til að mæla hitann er það að sjálfsögðu fullkomið.

9. Steikið kleinuhringina í 3-4 mínútur á hvorri hlið. Takið þá upp úr og leggið á disk með eldhúsbréfi á svo restinn af olíunni fái að leka í bréfið.

10. Leyfið kleinuhringjunum að kólna á meðan þið hrærið saman súkkulaðismjörinu og plöntumjólkinni þar til það verður fallega mjúkt og slétt.

11. Stingið gat í hliðina á hverju kleinuhring og notaði sprautupoka til að sprauta fyllingunni inn í þá. Passið að kleinuhringirnir séu alveg kaldir þegar þið setjið fyllinguna inn í.

-Njótið vel

Þessi færsla er unnin í samstarfi við Violife á Íslandi.

Vegan taquitos

Í dag deilum við með ykkur uppskrift af vegan taquitos. “Hvað er taquitos?” spyrja eflaust einhverjir, en taquitos eru litlar maíspönnukökur eða hveiti tortillapönnukökur fylltar með gómsætri fyllingu, rúllaðar upp og steiktar eða djúpsteiktar. Taquitos eru svo bornar fram með því sem mann lystir og að okkar mati er þetta hinn fullkomni helgarkvöldmatur. Krispí að utan með mjúkri fyllingu inní, bornar fram með gómsætum sósum, tortillaflögum og litríku grænmeti. Þetta er eitt af því besta sem við systur höfum eldað lengi!

Sólin hefur skinið mikið uppá síðkastið og við komnar í mikið grillstuð og hlökkum til að byrja að vinna að sumarlegum grilluppskriftum fyrir ykkur. Okkur þætti ótrúlega gaman ef þið sendið okkur hugmyndir af réttum sem ykkur langar að sjá, hvort sem það er matur á grillið eða aðrar sumarlegar uppskriftir.

Það er einmitt eitthvað svo sumarlegt við þessar gómsætu taquitos. Við erum ekki vissar hvort það eru fallegu litirnir, eða samsetningin af bragðinu, en það skiptir svo sem ekki öllu. Við sjáum fyrir okkur að gott sé að borða taquitos úti í sólinni með gómsætu meðlæti, eins og guacomole með miklum límónusafa. Gera svo einhvern ískaldan og safaríkan drykk með og njóta í botn.

Færsla dagsins er í samstarfi við Old El Paso, Við notuðum frá þeim white corn vefjurnar, Salsa dip, tortillaflögurnar og tacokryddið. Vörurnar frá Old El Paso eru ótrúlega gómsætar og henta ótrúlega vel í þennan frábæra rétt sem og fleiri af okkar uppáhalds mexíkósku uppskriftum.

Sjáiði litina? Ég er á því að allt sem er svona litríkt og fallegt sé gott. Allavega nánast allt hehe.

Vegan Taquitos

Hráefni;

• Olía til að steikja upp úr

• 2 hvítlauksgeirar

• 1/2 rauðlaukur

• 1 pakki vegan “kjúklingur”

• 1 pakki tacokrydd frá El Old Paso

• 1,5 dl vatn

• 1 dl vegan rjómaostur

• 1,5 dl svartar baunir úr dós

• 1 - 1,5 dl Taco dip frá Old El Paso

• Safi úr 1/2 lime

• Nokkrir dropar af sterkri sósu (má sleppa) - við notuðum mangó-habanero sósu

• Salt og pipar eftir smekk

• Rifinn vegan ostur

• 2 pakkar White corn tortillur frá Old El Paso (í hvorum pakka eru 10 vefjur)

Aðferð:

1. Leyfið vegan “kjúklingnum” að þiðna.

2. Rífið “kjúklinginn” í sundur með því að nota tvo gaffla.

3. Pressið hvítlaukinn og skerið rauðlaukinn í þunna strimla.

4. Hitið olíu á pönnu.

5. Steikið hvítlaukinn og laukinn á pönnunni þar til þeir hafa fengið svolítinn lit.

6. Bætið vegan “kjúklingnum” á pönnuna og steikið í nokkrar mínútur.

7. Bætið kryddinu og vatninu út á og steikið í nokkrar mínútur í viðbót.

8. Hellið baununum í sigti og skolið undir köldu vatni til að fá af þeim mest af safanum úr dósinni.

9. Bætið baununum á pönnuna ásamt salsasósunni og blandið vel saman við restina.

10. Bætið að lokum rjómaostinum, sterku sósunni og limesafanum út á og leyfið þessu að malla í nokkrar mínútur. Saltið og piprið ef ykkur finnst þurfa.

11. Takið af hellunni og leggið fyllinguna til hliðar.

12. Útbúið rúllurnar með því að leggja vefju á borðið, strá vegan osti í botninn, setja svolítið af fyllingunni í og rúlla upp. Það á að vera hægt að rúlla þetta frekar þetta svo passið að setja ekki alltof mikið af fyllingu í hverja. Endurtakið svo þar til þið hafið fyllt allar vefjurnar.

13. Hitið slatta af olíu á pönnu. Djúpsteikið hverja rúllu þar til hún fær gylltan lit.

14. Leggið á fat með eldhúspappír sem dregur í sig svolítið af olíunni.

Meðlæti sem við höfðum með rúllunum:

• Icebergsalat

• Ferskt jalapeno og habanero chili

• Vegan sýrður rjómi

• Vorlaukur

• Tortillaflögur frá Old El Paso

• Kóríander

• Guacomole

  • Lárpera

  • Tómatur

  • Rauðlaukur

  • Hvítlaukur

  • Limesafi

  • Salt og pipar

• Maísmajónessalat

  • Steikur maís

  • Vegan majónes

  • Vegan sýrður rjómi

  • Vorlaukur

  • Kóríander

  • Limesafi

  • Salt og pipar

Takk fyrir að lesa og njótið!

Helga María og Júlía Sif

-Þessi færsla er í samstarfi við Old El Paso á Íslandi-

Vegan ostahorn með aspas og sveppum

Í dag deilum við með ykkur uppskrift af gómsætum ostahornum með sveppa- og aspasfyllingu. Þessi ostahorn eru fullkomin til að taka með sér í ferðalagið eða bjóða uppá í veislum. Þau bragðast eins og uppáhalds heiti brauðrétturinn okkar og við erum vissar um að þau munu slá í gegn við allskonar tilefni.

Svona horn er að sjálfsögðu hægt að leika sér endalaust með og breyta til hvað varðar fyllingu. Færsla dagisins er í samstarfi með Violife og í aspashornin notuðum við bæði hreina rjómaostinn þeirra og rifinn ost. Vegan ostarnir og rjómaostarnir eru svo fullkomnir í svona horn en Violife framleiða allskonar spennandi bragðtegundir. Við gætum t.d. ímyndað okkur að bæði hvítlauks- og jurtarjómaosturinn og chilirjómaosturinn séu æðislegir í svona horn. Af sneiddu ostunum væri svo örugglega æði að nota t.d. þann með sveppabragði og þann með “kjúklingabragði”.

Það er langt síðan við systur hittumst síðast og blogguðum saman. Ég (Helga) bý í Svíþjóð svo við erum vanar að þurfa að vinna svolítið i sitthvoru lagi. Núna er ég þó á landinu og því höfum við getað tekið okkur smá tíma í að blogga. Það er alltaf jafn gaman þegar við vinnum saman og það minnir okkur á það hversu dýrmætt það er að við rekum þessa síðu saman, sem í fyrstu átti bara að vera lítið “hobbí”, en er í dag orðið svo stór hluti af lífinu okkar.

Við hlökkum til að heyra hvað ykkur finnst um aspashornin og hvort þau munu klárast jafn fljótt og þau gerðu hjá okkur. Eins megiði endilega deila með okkur ef þið prófið að gera aðra fyllingu í hornin og hvernig það kom út. Við elskum að fá nýjar og skemmtilegar hugmyndir.

Ostahorn með aspas og sveppum

Hornin sjálf:

• 8-10 dl hveiti (byrjið á 8 og bætið svo við eftir þörfum)

• 1 pakki þurrger

• 1 msk sykur

• 1 tsk salt

• 5 dl plöntumjólk

• 100 gr smjörlíki

Aðferð:

1. Bræðið smjörlíki í potti og bætið mjólkinni saman við. Mjólkin þarf ekki að hitna mikið, heldur vera við líkamshita.

2. Hellið mjólkurblöndunni í stóra skál og stráið þurrgerinu saman við. Leyfið því að standa í nokkrar mínútur eða þar til það byrjar að freyða svolítið.

3. Bætið restinni af hráefnunum útí.

4. Bætið við meira hveiti ef þarf. Ég held ég hafi á endanum notað um 9 dl. Deigið má ekki vera of þurrt, þið eigið að geta stunduð hreinum fingri ofan í án þess að deig klessist við hann. Hnoðið deigið létt. Ef þið notið hrærivél er fínt að miða við að deigið sé tilbúið þegar það byrjar að losna frá skálinni.

5. Leyfið deiginu að hefast í klukkutíma í skál með viskustykki eða plastfilmu yfir.

6. Hitið ofninn í 200°c

7. Skiptið deiginu í tvennt ef þið viljið hafa hornin frekar stór en í fernt ef þið viljið hafa þau minni (við gerðum stór) og fletjið út hvern helming fyrir sig í hring. Skerið niður í sneiðar (sjá mynd að ofan), setjið fyllingu á og stráið rifnum Violife osti yfir. Passið ykkur að setja ekki alltof mikið af fyllingu í hvert því það þarf að vera hægt að rúlla þessu upp án þess að allt velli úr. Rúllið upp frá breiðari endanum.

8. Smyrjið með örlítilli vegan mjólk og stráið yfir einhverju sem ykkur þykir gott. Við notuðum sesamgaldur frá pottagöldrum en það er líka gott að strá yfir sesamfræjum, grófu salti eða jafnvel rifnum Violife osti.

9. Bakið í 10-12 mínútur eða þar til hornin hafa fengið gylltan og fínan lit.

10. Leyfið þeim að kólna svolítið áður en þau eru borin fram.

Aspas- og rjómaostafylling:

• Olía til steikingar

• 2 öskjur hreinn rjómaostur frá Violife

• 1 dós grænn aspas plús 1 msk safi úr dósinni

• 100 gr sveppir

• 1 sveppakraftur

• Salt og pipar ef þarf. Sveppakrafturinn er saltur svo smakkið til svo að þetta verði ekki of salt.

Aðferð:

1. Hitið olíu á pönnu

2. Saxið sveppina smátt og steikið á pönnunni

3. Saxið aspasinn líka aðeins og bætið á pönnuna

4. Myljið sveppakraftinn og bætið á pönnuna ásamt 1 msk af aspas safanum

5. Takið af pönnunni og leyfið að kólna aðeins

6. Setjið rjómaostinn í skál og bætið sveppa- og aspasblöndunni út í og hrærið saman.

7. Bætið salti og pipar ef ykkur finnst þurfa.

Takk fyrir að lesa og njótið vel!

-Helga María og Júlía Sif

-Þessi færsla er í samstarfi við Violife á Íslandi-